larawan

Kadilima'y pilit na sinusupil
ng ningas ng kandila -
Isang malikot na sanggol na
pumupunit palabas sa itim na puwerta
O kaya'y isang kahel na tutubing
nagpupumiglas makalaya sa itim
na sapot
Ang tunggaliang liwanag-dilim na ito
ang siyang nagbibigay depinisyon
Sa bawat lukot at guhit sa mukha
ng isang ina
At sa kislap ng mata at bilog
ng pisngi ng isang paslit
Kuwadrado ng malamlam na sinag,
sila'y kapwa bumibigkas ng abakada.


03 April 05
Sunday
11.19 pm