babala sa kartograpo

Huwag mo nang tangkaing gawan ng
mapa ang aking isip
Iligpit mo na ang iyong lebel pang-surbeyor
Sapagkat ang mga muhong ibinaon ng
kahapon, kadalasa'y hinuhugot ng mga
halimaw ng ngayon -
Ipinupukpok sa kanilang ulo upang
magpatiwakal.
Kung balak mong mag-iwan ng sariling
tanda na para bang mga tuldok sa
librong pambata
Na sa bandang huli'y iyong pagdudugtung-
dugtungin
Upang makalikha ng anyo, makahalaw ng
pamilyar na larawan,
Ang kompas ng iyong mabuting pakay,
manginginig lamang sa pagkapahiya.
Kukote ko'y walang takdang hilaga
Ang kinatatayuan mo'y makunat na luwad -
Regular na nilalamas, nilalapirot,
minamasa ng higanteng kamay ng bukas,
Kamay ng paslit na humuhubog ng
kakatwang pigura.
Lumabas ka na sa isip ko
Bitbitin mo na ang iyong lebel pang-surbeyor
at kompas
Baka ika'y maabutan pa ng higanteng kamay
at malamas, malapirot, at mamasa
kasahog ng makunat na luwad.


22 june '05
wednesday
7.22 pm